Ua pequeinha apresentaçon de PICUÔTE

Picuôte yê ua típica tiêrra transmontana, situada an pleno Praino Mirandés, miêsmo an ne alto de las majestosas Arribas de l Douro. Actualmente, tamien fai parte de l Parque Natural de l Douro Anternacional. La freguesie de Picuôte fai parte de l cunceilho de Miranda de l Douro, çtrito de Bregança, i yê compuôsta por dues aldês, Picuôte i Barruôcal.

Picuôte yê conhecida por muitas rezones: ua deilhas yê la Barraige de Picuôte, cunstruída antre 1954 i 1958, nun ampressionante garganta de l riu Douro, an ne sou troço anternacional. Einaugurada an Janeiro de 1958, ten ua altura de 100 metros, l sou coronamento ten un comprimento de 92.30 metros, i ls sous 3 geradores ténen la capacidade de produzir 180 MWh.

Outra rezon pula qual Picuôte yê conhecida yê que, antre todas las tiêrras pertenecentes a la chamada Tiêrra de Miranda, yê aqueilha que mais ten defendido i ancentibado l uso de la Lhéngua Mirandesa. Isso puôde ser cunstatado pul facto de que muitas de las rues de la aldê tenéren placas cun ls sous nomes scritos an pertués i mirandés; ou inda pul facto de ls cartazes cun ls programas de las fiêstas tamien stáren scritos an pertués i mirandés.

Debido a esta amportante rezon lhenguística, Picuôte yê ua de las tiêrras pertuesas que mais frequentemente aparece an nes noticiários telebisivos i na amprensa scrita (nomeadamente, na amprensa diária). Assi, estes motibos (i outros, que bos cumbidamos desde yá a çcubrir) fázen de Picuôte un bon çtino de férias, adonde se puôde fugir a la confuson de l die-a-die, i tamien conhecer outros modos de bida i outras paisages.

Por esso, aceite l nuôsso cumbite, i benga dende...