Salindo de l Porto:
Debe-se apanhar la A4 anté Amarante, açpuis l IP4 anté la pormeira salida de Macedo de Cavaleiros. Açpuis de passar la cidade, apanha-se la EN216 anté Mogadouro (esta yê la pior parte de la biaige). Eiqui chegados, apanha-se la EN221 an direcçon a la cidade de Miranda de l Douro. Trés quilómetros apuis la bila de Sendin, ancuntrará uas placas, a la dereita, para Picuôte. Mais trés quilómetros pula EN221-6, chega-se finalmente a Picuôte.

Salindo de Lisboa:
Debe-se apanhar la A1 anté Coimbra, açpuis l IP3 anté Biseu. Ende, apanha-se l IP5 anté Celorico de la Beira, de adonde se debe seguir pula EN102 anté l Pocinho, adonde se debe apanhar la EN220 an direcçon a Torre de Moncorvo, seguindo para Mogadouro (EN221, açpuis de las placas cun la strada que ben de Freixo de Spada a la Cinta). A partir de Mogadouro, l camino yê eidêntico al percurso çcrito para quien sale de l Porto.

Salindo de Bregança (bia Alcañices):
Hai dues alternatibas para este percurso, dependendo de la priêssa que se lhiêba pa la biaige. Ls mais apressados dében apanhar l IP4 anté Quintanilha (se esse cacho de la strada yá stubir finalmente cunstruído), i atrabessar la fronteira para Spanha, apanhando la strada que bai para Çamora. Un pouquito açpuis de la bila de Alcañices (adonde foi assinado l tratado atrabeç de l qual, hai cerca de 700 anhos, l Reino de Castiêlha reconhecie las fronteiras de l nuôsso país), irá ancuntrar, a la dereita, ua strada para Pertual. Açpuis de haber passado Moveros, la reentrada an Pertual fai-se pula capiêlha de Nuôssa Senhora de la Lhuç. An ne cruzamiênto seguinte, debe-se birar a la squiêrda, an direcçon a Einfainç i a la cidade de Miranda de l Douro. Apanha-se la EN221 an direcçon a Mogadouro. Cinco quilómetros apuis, debe-se apanhar ua strada a la squiêrda, que conduç a Cérceno, Bila Chana de Barceosa i, finalmente, Picuôte.

Salindo de Bregança (bia Bomioso):
Ls biajantes menos apressados i "mais nacionalistas" puôden seguir por outro camino. Salindo de Bregança, apanha-se la EN218 an direcçon a Miranda de l Douro. Açpuis de haber passado Caçareilhos (yá apuis de l cruzamiênto que conduç a la bila de Bomioso), debe-se birar a la dereita nua strada que lhiêba a Bilasseco. Alguns quilómetros apuis esta tiêrra, ancontra-se un outro cruzamiênto, an ne qual se debe birar a la squiêrda para Dues Eigreijas. Al chegar al cruzamiênto cun la EN221, debe-se birar a la squiêrda para, cerca de 300 metros mais alantre, birar a la dereita, apanhando-se ua strada que lhiêba a Bila Chana de Barceosa i Picuôte, l nuôsso çtino final.

Salindo de l Sul:
Para aqueilhes que bénen de l Sul de Pertual, la strada de referência para chegáren a Picuôte yê l IP2 (ou, melhor dito, ls bários cachos de l IP2, sabe-se alhá quando será apenas um cacho...). Assi, quien ben de l Algarbe ou de l Alentejo debe seguir pulas dibersas stradas que fázen l IP2, passando por Beja, Ébora, Portalegre, Castelo Branco, Cobilhã i Guarda. Nesta última cidade, debe apanhar l IP5 an ne sentido de Biseu, seguindo anté la salida de Celorico de la Beira. Ende, tórna-se a apanhar l IP2 (EN102). A partir de eiqui, l camino anté Picuôte yê eidêntico al yá çcrito para quien sale de Lisboa.

Salindo de Çamora:
Quien sale de Çamora, debe apanhar la strada N122 an direcçon a Pertual. Açpuis de haber passado la barraige de Ricobayo, cunstruída subre l riu Esla (un grande afluente de l Douro), debe-se apanhar ua strada que conduç a Pertual, an direcçon a Miranda de l Douro. Atrabessando la barraige de Miranda, chega-se a la cidade de Miranda de l Douro. A partir deiqui, l percurso yê eidêntico al çcrito para quien ben de Bregança por Alcañices.

Salindo de Salamanca (bia Miranda de l Douro):
Hai dues alternatibas para quien ben de Salamanca. La mais curta cunsiste an apanhar la strada SA300 an direcçon a Ledesma. Nesta lhocalidade, apanha-se la strada SA311 anté Almeida. Eiqui, segue-se pula ZA322, que nos lheba anté Bermillo. An Bermillo, segue-se pula ZA321 anté al cruzamiênto cun la strada ZA324. Bira-se a la squiêrda, an direcçon a la fronteira pertuesa, passando pula barraige de Miranda. A partir de eiqui, l percurso yê eidêntico para quien ben de Çamora.

Salindo de Salamanca (bia Bemposta):
La outra alternatiba cunsiste an salir de Salamanca pula strada C517, an direcçon a Vitigudino. An Villar de Peralonso, apanha-se outra strada para Ahigal de Villarino. Nesta lhocalidade, apanha-se la strada C525 anté Fermoselle. Eiqui, segue-se la strada que bai an direcçon a la fronteira pertuesa, passando pula barraige de Bemposta. Segue-se pula N221-7 anté al cruzamiênto cun la N221, adonde debe birar a la dereita an direcçon a Sendin i Miranda de l Douro. Açpuis de Sendin, apanha-se, a la dereita, la N221-6, que nos lhebará anté Picuôte.