L Termo de PICUÔTE

Las pormeiras eimaiges desta página son uns de ls principales motibos de orgulho de Picuôte: trata-se de la fenomenal bista de l riu Douro, ancaixado antre las magníficas paredes de piêdra que delhimítan la fronteira antre Pertual i Spanha (eiqui, puôde-se realmente dezir que eijiste fronteira...), i de la ampressionante curba çcrita pul riu. Esta bista yê obtenida a partir de l miradouro de la Peinha de l Puio. La peinha yê un sítio rochoso, situado a la borda dun çpenhadeiro subre l Douro, de adonde se puôde cuntemplar l riu, ls prainos de Castiêlha, i las ancuôstas cobiêrtas por oulibeiras i, an menor número, almendreiras. Muitas bezes, puôden ser apreciados ls bolos de bárias abes de rapina que habítan nesta region (parte antegrante de l Parque Natural de l Douro Anternacional). L silêncio que eiqui se puôde çfrutar, apenas anterrompido pul barulho de ls cabos de alta tenson que trázen la einergie eilhéctrica produzida na Barraige de Picuôte, cumbida a la meditaçon i al çcanso.

De restro, esta panorâmica yê tan zlumbrante, que yê usada cumo la principal eimaige dun cartaç de promoçon turística de la bezina probíncia spanhola de Çamora.

A seguir, seran apresentadas outras fotografies de l Riu Douro, obtenidas an ne termo de Picuôte. An todas eilhas se puôde apreciar l ancaixado balhe por adonde cuôrren las augas de l Douro, tornando la paisage zlumbrante i amponente.

Apuis de habermos focado specialmente l Riu Douro, yê bien lhembrar que hai outro riu que passa an Picuôte. Trata-se de la Ribeira de Picuôte, un pequeinho curso de auga que passa acerca de Picuôte. Al ampeçar l sou camino çcendiênte an direçon al riu, adonde desauga, forma ua série de cachoneiras, aprobeitadas desde tiêmpos antigos pa la produçon de farinas, atrabeç de einúmeros molinos que abúndan nas íngremes marges de la ribeira. Ua de las pormeiras quedas de auga formadas pula ribeira dá ourígen a ua piscina natural, conhecida cumo "L Piêlgo". Anfeliçmente, esta dádiba de la Natureza nun puôde ser aprobeitada durante ls meses tórridos de l berano, porque la Ribeira seca durante essa staçon.

Por fin, la nuôssa besita guiada pul termo de Picuôte lhiêba-nos a un sítio conhecido cumo "Ls Santos". Afastado de Picuôte cerca de meia hora a pie, esse lhugar yê un lhape cunstruído na piêdra, adonde fúrun pintadas bárias eimaiges de santos cristianos. Actualmente, essas eimaiges ancontran-se bastante danificadas, i al abandono, mas cunsiêguen-mos fazer pensar subre cumo haberan sido eili pintadas, i por quien. Ua possible splicaçon pa l aparecimiênto destas eimaiges yê la eijistença, acerca, de las ruínas de la capiêlha de San Paulo (yá na becina freguesie de Sendin), un antigo mosteiro adonde bibírun monges hai alguns siêclos atrás. Subre este monumento religioso, puôde lher un artigo publicado an ne Jornal de Notícias, an ne die 27 de Abril de 1999.