Un Passeio Birtual por la Aldê de PICUÔTE

Picuôte yê ua tiêrra tipicamente transmontana, cun las sues casas de piêdra; ls bancos a la borda de las puôrtas, a la antrada de las casas, adonde ls picoteses se júntan als fins de tarde para "poner la cumbersa an die"; las bicas públicas (si, porque eiqui l'auga yê un bien precioso, debido als rigores de l clima, principalmente an ne berano); las fuôntes para ls animales; las bárias capelhicas dedicadas als santos an que l puôbo deposita la sue fé; ls burros que ban pa ls cerrados para pacer tranquilamente durante l die; etc. Mas, para alhá de que yê comum an todas las nuôssas tiêrras, Picuôte tamien ten cousas que solo son sues, i que nun puôden ser ancuntradas an mais lhado ningun. Assi, einiciaremos eiqui ua pequeinha biaige pul que de melhor Picuôte ten para mos ouferecer.

Ampeçaremos l nuôsso camino pul lhugar mais central de qualquiêra tiêrra pertuesa: la eigreija.

La pequeinha eigreija de Picuôte stá bien an ne centro de la tiêrra. Ten un aspecto bastante lhimpo i claro, i an ne sou anterior ancontra-se un púlpito an piêdra, bastante balioso de l ponto de bista stético i arquitectónico. Al lhado de la eigreija, stá l eidefício de la Casa de l Puôbo de Picuôte, colectibidade que muito cuntribui pa la dinamizaçon de la bida cultural i social de la tiêrra. Tamien al lhado de la eigreija ancontra-se la "Cochina" de Picuôte (nua aluson a la mais famosa "Porca de Murça"). Este monumento yê chamado, puls antendidos an Arqueologie, por "berron". La Cochina de Picuôte fui ancuntrada an nes terrenos acerca de Picuôte, i pensa-se que terá sido un ídolo adorado por pobos antigos que habitórun la region. Na realidade, yê ua de las bárias eibidências de la presença humana an Picuôte hai yá muitos siêclos.

Seguindo pula rue principal, chega-se al Tumbar, adonde stan l coreto de la tiêrra, la Curralada, un pequeinho spaço de cumbíbio i lhazer, cujo ls lucros de sploraçon son pa ls Mordomos de las Fiêstas de la tiêrra (Santo Cristo de ls Carrascos i Santa Bárbala), i l café i l restaurante Carmona. Mais abaixo queda la Capiêlha de la Santa Cruç. An ne Tumbar, puôde-se ber un de ls melhores eisemplos de casas rústicas de Picuôte, actualmente abandonadas, mas que míran ls besitantes cumo que a pedir que mos apoderemos deilhas pa ls dar bida mais ua beç.
Descendo l Tumbar, siêgue-se pa l Toural, adonde ancuntramos tamien bárias casas de piêdra, dignas de séren admiradas. L Toural ten esse nome, porque era eiqui que se dában ls "ancuôntros amorosos" antre l ganado de Picuôte. Actualmente, an ne Toural, fázen-se durante ls meses de berano, cunferências sobre la tiêrra i la cultura mirandesas. La scuôlha desse lhargo para acolher tales einiciatibas yê por ser un de ls lhugares mais rústicos que se cunsérban nesta tiêrra.
De l Toural, seguimos agora pa la Capiêlha de Santo Cristo de ls Carrascos. Situada an ne alto de ua pequeinha eilebaçon, de adonde se puôde obtener ua bista panorâmica de la tiêrra i alredores, esta capiêlha fui construída an stilo românico, sendo probable que tenga ua necrópole romana. La capiêlha de Santo Cristo de ls Carrascos (an pertués perdiu l sobrenome "de ls Carrascos") serbiu de eigreija paroquial de Picuôte anté la construçon de la actual eigreija. Cumo an qualquiêra tiêrra pertuesa, tamien la giênte de Picuôte ten la sue fiêsta dedicada al Santo Cristo de ls Carrascos. Fai-se an ne 1º Deimingo de Agosto, todos ls anhos.
Descendo de la Capiêlha de Santo Cristo de ls Carrascos, i passando outra beç pul Toural, apanhamos la Rue de la Peinha de l Puio (Rua da Fraga do Puio, an pertués), an direcçon a un de ls lhugares mais procurados puls forasteiros que besítan Picuôte: la Peinha de l Puio. Para chegar a esse lhugar, yê preciso afastarmo-nos un cachico de las casas, l que possibilita, dessa forma, bonitas eimaiges panorâmicas de Picuôte.